الأربعاء، 1 مايو، 2013

أعضاء ورشة التأمل... التأمل فى رحلة حياة .. المدرب عاطف نصيف




1
جلست أتأمل الطريق الطويل الذى قطعته فى الحياة، والذى يمتلىء بالكثير من المعاناة، والمتعة، واللا شىء أيضا, فوجدت

حياتي فى هذا الطريق بهذه الصورة:
الطفولة
كانت مرحلة الطفولة مختلفة بالنسبة لي عن أي طفل آخر في مثل سنى فقد كنت أعاني من الوحدة الشديدة التى سببت لى مشاكل كثيرة فى ما بعد فقد كنت أتغيب مدد طويلة عن المدرسة بسبب السفر مع الأسرة
و فى فترة الدراسة كنت أحلم بدخول الجامعة لأحقق أحلامى فكنت فى فترة الدراسة أدرس الكمبيوتر و أمارس رياضة عنيفة
و كنت أعتقد أن الجامعة بها فرص و أوقات تساعد على ذلك.....
2
الجامعة و عند دخول الجامعة أصبت بخيبة الأمل الأولى و أنا فى بداية حياتى فقد ألتحقت بكلية الآداب و دخلت قسم الفلسفة على غير رغبتى و قضيت به عام كامل
تركت كلية الآداب، وألتحقت بمعهد سياحة و فنادق لتبدأ سلسلة جديدة من الطموحات و الأحلام.
كنت أعمل بالسياحة منذ التحاقى بالمعهد و بعد تخرجى ما بين تدريب دراسى و فترة عمالة صيفية و معين و غيره....
عملت فى كل ما يتعلق بالسياحة . الأغذية، والمشروبات ,كعامل بمطعم، ومضيف وغيره....
عملت بالحسابات، و موظف اتصالات، حتى البارات و نوادى القمار عملت بها 
عاطف نصيف 
  "1"....
3



عندما قررت اعتزال العمل بالسياحة كان قراراً صعباً، وكان القرار الصعب الثانى فى حياتى بعدما لم أوفق فى كلية الآداب و ألتحقت بمعهد الساحة و الفنادق .
و قد اتخذت هذا القرار بعد عمل مدة فى الفنادق الكبرى دون جدوى . فبعد تفكير وجدت أنى لن أصل إلى شيء. فالعمل و الترقى يتم بالمحسوبية . واذا استمريت سأظل عامل مطعم أو حتى موظف بسيط.

4



مرت بعد ذلك فترة وجيزة لكنها كانت مليئة بالأحداث المثيرة .
ساعدنى والدى على افتتاح محل أمام مدرسة ليكون مكتبة صغيرة، لم يمض عام واحد حتى توفى والدى.... رحمه الله...
وجاء لي التعيين فى وزارة المالية . وألتحقت بالعمل بعد فترة طويلة من إلحاح العائلة فقد كنت رافضاً للعمل الحكومى.
وعملت لمدة خمس سنوات موظف بسيط بالشهادة الإعدادية. وكانت الفترة الوحيدة التي لم يكن لي بها أية أهداف فى الحياة ، فقد كانت فترة مليئة بالاستهتار و المجون.....


                              5
فى ما بعد تمت معادلتى بالمؤهل العالى وحصلت على درجة باحث بادارة شئون العلملين فى وزارة المالية .
و فى نهايات عام 2010 بدأت دراسة التنمية البشرية . اصبحت  أرى كل شيء على حقيقته......
و عند قيام الثورة بدأت تغيير حياتى تدريجيآ.و بدأت  أنهى حياة الأستهتار....
فقد رأيت الموت بعينى.
انضممت الى ساقية الصاوى و تعلمت هناك الكثير .كالأورجامى و الأيكيدو ....
و تعرفت على كبار الثقفين و الشعراء. و اكملت الدراسة, وحصلت على دبلومة إدارة الموارد البشرية و ماستر التنمية البشرية.

                                         6
أشياء أخرى لازلت أتعلمها، فتعلمت اليوجا و الاسترخاء، و لازلت مستمر بها....أثناء تدريبات اليوجا و أنا أقوم بها وحدى، رأيت أشياء لم أرها من قبل، أشياء مضت و لم أكن أرغب بتذكرها .
وتعلمت كيفية التعامل مع الذكريات المؤلمة.
و رأيت جوانب مشرقةلم أكن اتوقعها لأرى نفسي شخص آخر لا أقهر.
فقد أصبح بإمكانى تعديل جسمى بالشكل و القوام المناسب الذى كنت أرغب به.و أصبح لدى صبر قد يهدم الجبال .
و أصبحت قادراً على التعايش مع الظروف الصعبة و القيام بأى مجهود.

                                         عاطف نصيف




 

الاثنين، 22 أبريل، 2013

أعضاء ورشة التأمل .... جى جى روز... مرت أحداث كتير






مرت أحداث كتيرة فى حياتى منها الحلو ومنها مش حلو خالص
وقابلت ناس كتير منهم الكويس .... منهم السئ .....
وعشان الطيبين فى حياتى قلائل ووالوحشين اكثر فكتر خيرهم علمونى كتير علمونى انى ماثقش فى حد ابداً...
 ولا أنتظر شئ من أحد وأعامل الناس لله وربن وكيلى....
 اعتمادى فى حياتى على الله سبحانة وتعالى ثم نفسى....
 كل ده مش مهم عادى وبيعدى...
 وحلمت أحلام كتيرة منها اللى اتحقق ومنها اللى مقدرتش أحققة ....
زى انى أسافر أنا بحب السفر أوى....
 ومنها كان نفسى أدرس قانون وأحضر رسالة فيه...
 وفيه أحلام كتير نسيت احققها ....
كل ده بردو مش مهم وعادى وبيعدى .....
لكن اللى عايزة اقولة ان فى ظل الأحداث الكتيرة اللى بتحصل واللى بتمر علينا وبتكون مؤلمة خصوصا لما تفقد اعز الناس ليك...
أو  بمرور الوقت ....
تخسر كرامتك وثقتك بنفسك تتهز وتفضل تضغط على نفسك عشان المركب تمشى والأمور تعدى ....
بس أحيانا طاقتنا بتقل ومش بنحتمل وبنقسى على نفسنا كتير .....
كل دة بردو مش مهم وعادى وبيعدى .....
لكن لما نوصل لمرحلة نصحى من النوم وفجأة تحصل حاجة ولتانى مرة - بس من فترة اطول شوية-
 تصحى من النوم وتلاقى نفسك صفحة بيضا .... تلاقى نفسك فى مكان متعرفوش....
 وتبص فوشوش اللى حواليك ....
وتلاقى نفسك مش عرفهم.... وتسأل هما مين - حتى اسمك مش فاكره - كل دة لا يتعدى ثانية أو ثانيتين
وفجأة بردو تفتكر كل حاجة فى ثانية وتكتشف انك فى بيتك ....
وفى وسط أولادك ...
يبقى ساعتها دة المهم إنك تقف مع نفسك وقفة صح وتلحق روحك قبل ما ثروتك الحقيقة تضيع منك.....
 عشان كدة انا جيت الورشة عشان آخذ من الدنيا هدنة ....
وأحس بسلام مع نفسى ....
وأنا سعيدة بتجربتى مع ورشة التأمل ساعدتنى على حاجات كتير وغيرت نظرتى للحياة وحسيت بسعادة داخلية من ذاتى....
 ولأول مرة كنت دايماً أحس بالسعادة من خلال الناس اللى حواليا يكونو سعداء كمان ....
 أعضاء الورشة كلهم طيبن وحبيتهم اوى يارب تحققوا كل احلامكم وماتمروش بضغوط تعطلكم.

جى جى روز

21 أبريل   2013

السبت، 20 أبريل، 2013

أعضاء ورشة التأمل ... محمد داوود "زى اى شاب حلمت"



زى اى شاب حلمت من صغرى انى اكبر ويكون عندى فلوس وعربية ومشهور وكل الناس تشاور عليه وتقول هو ده الباشا البرنس, الوزير, السفير,الرئيس, 
مش مهم المنصب كده كده هيجى ما انا مفيش اى شىء تعطلنى انى اكون ناجح.
طول ما عندى عقل وبفكر وصحة فى جسمى اقدر اعمل المستحيل .
كنت دايما بحسد العلماء والانبياء عشان الهبات اللى عندهم وملكتهم وازاى قدروا يوصلوا ان اسمهم مخلد فى التاريخ انا كان اهم حلمى انى برده اسمى يكون مخلد زيهم عشان انا زيهم هما بنى ادمين وانا بنى ادم كل الرموز اللى مرت عليه فى حياتى واللى كانت مشهوره كنت بحبها واحب اقرا كل حاجة عنها واقعد ابص فى صورهم كل واشوف مين فيهم اكتر واحد شبهى بس ازاى بقى هبقى زية دى المشكلة .

حلمت انى ادخل كليه طب واطلع دكتور واعالج الناس واعمل عمليات وابقى مشهور اوى حلمت انى مش هخلى اى انسان مريض ولا فقير كل الفلوس اللى هتجيلى دى هتكون عطية من ربنا ليه اقدر اساعد بيها كل الناس واجوز البنات اللى اهلها مش قادره تجوزهم و هخلى كل الاطفال اللى فى الشارع اللى بيشتحوا و وبيبيعوا وبيتسولوا هخدعهم احطهم فى مدينة كبيرة واعملهم واربيهم واخليهم علماء ودكاتره وفنانين وافتح بيهم مشاريع تحرك الارض تغير شكل الخريطة 

حلمت احلام كتيرة اوى ابسطها انى لما ابص فى وشوش الناس الاقيها كلها مبسوطة وبتضحك بس كل فضل يصغر يصغر لحد ما بقى متلخص فى انى الاقى اى شغلانة اى حاجة محترمة ممكن اعتمد بيها على نفسى ومخدش مصروف من اهلى ....
اشتغلت فى اماكن كتير اوى فوق ما اى حد ممكن يتخيل افتكر انى اول مره اشتغلت فيها كنت شغال فى سايبر نت كان اهم تارجت عندى فى اليوم انى اخلى الشخص اللى يخش المحل ما يخرجش وهو معاه مليم وفضلت شغال فتره لحد ما بدأت احس انى حياتى بقت مملة وايقاعها بطىء وحسيت ان الوقت هيمر ومش هقدر اعمل الانجازالحلم وقررت انى اسيبها.

وفضلت اتنقل مش شغلانة لشغلانة وانجح وافشل وانجح واسيبها بس الشىء اللى انا فاكره انى عمر ما سبت مهنة ورجعتلها ابدا فى حياتى غير التمثيل وده يمكن السبب فى انه عزيز عليه حبتين .

بدأت ابص على البلد لقيت مستقبل مظلم بجد بلاك بلاك يعنى مش اى كلام بتشوف صحابك المهندسين والدكاتره قاعدين معاك على القهوه وتحس انهم بيتندموا على السنين اللى ضيعوها فى التعليم وانهم يا ريتهم كانوا اعلموا صنعة .
هل ممكن فعلا كل السنين اللى ضاعت من عمرى وعمر صحابى فى التعليم راحت هدر هل فعليا هتفضل ولدتى تدينى مصروفى طول عمرى هل مفيش جديد ...

هل البلد دى مش بتاعتنا ونروح نعيش فى بلد تانية ...

اصبح متااح ليك انك تفكر بس اوعى تفكر داخل حدود مصر لانك كده كده هتفشل ...

على فكره انا حلمت بالتابلت والعربيات عكس الجاذبية والضوء اللى يقدر يقطع الحديد قبل ما يتعلموا .

حلمت انى اصغر الكون من خلال محطات كونية تنشأ فى الفضاء حلمت ان العملة هتتلاشى ويصبح التعامل بالمعلومة والافكار حلمت انى الغى الاكل والشرب واسرع ايقاع الحياة والحركة حلمت انى ابنى بلاد على سطح المية بدل ما هى فاضية كتييييييييير ...

حلمت بس فى بلاد بره لما واحد بيحلم بيدعموه فى البلد دى لما واحد بيحلم بيدوسوا على اللى جابوه .

أعضاء ورشة التأمل .. آية محيسن ...2 يوم اليتيم


عيد اليتيم

عارف يعنى ايه تبقى يتيم ؟
انت اكيد بتجربها للحظات لما تبقى محتاج حاجه من مامتك او باباك
مش قصدى حاجه ماديه قصدى حاجه معنويه
 حنان مثلا
نصيحه
كلمه تفوقك 
نجحت مره وكنت مستنى تجرى عليهم وتفرحهم
او لما تفشل فى حاجه ومحتاجهم يقوموك
 لانهم اكتر ناس بيخافوا عليك وبيتمنولك الخير من غير ميكونوا عايزين منك اى مصلحه
 تخيل انت فى الوقت ده ملقتهومش بس انت عارف ومتاكد ومدرك انهم موجودين وانهم لو مش معاك فى الوقت ده هيبقوا معاك بعد كده
تخيل بقى لو هم مش موجودين ومش هيبقوا معاك بعد كده
طب اقولك على حاجه اصعب تخيل لو اتولدت لقيت نفسك فى دار ايتام وانت مش عارف مين باباك او مامتك مش هتحس بالمشكله دى وانت صغير لانك لسه مش مدرك
 ولما حد يجى يزورك تقوله ياماما وتبقى كل واحده تدخل عليك ماما واى واحد بابا وتفرح بلعبه ومصاصه واى حاجه حلوه
وتكبر شويه وتبدا تفهم انت فين وليه وتسال نفسك ليه واشمعنا انا ويجيلك كتير شعور بعدم الرضا واحيانا تحمد ربنا لان فى السرير اللى جنبك واحد يتيم زيك بس زياده عن كده انو معاق فتحمد ربنا
وتبقى مستنى عيد اليتيم اللى هو يوم واحد فى السنه عشان الناس تجيلك وتفرحك وكانهم جايين ياخدوا ثواب وماشيين
لغايه كده مفيش مشكله المشكله لما تكبر هتبقى مش قابل الناس اللى بتجى اليوم ده وتسال نفسك هما ايه بيحتفلوا بيه وانا يتي م وبعدين نسينى طول السنه وجايين اليوم يفتكرونى هتلاقى ساعتها من حقك انك تكره اليوم ده ويبقى اسوا يوم فحياتك وتفكر ساعتها هو ياترى انا ابن مين ولا انا اصلا ابن حرام ورمونى فى الشارع طب لو انا كده ليه ادفع غلطه ناس انا مليش ذنب فيها
ليه اتحمل حد فى اليوم ده يقولى بكره عيد اليتيم كل سنه وانت طيب
ليه لما ابقى فى المدرسه الاقى كل واحد مامته او باباه جاى ياخده وانا استنى الباص اللى هيجمع كل اليتامه ف عربيه واحده وياخدنا
ولما ابقى فى الجامعه معرفش احب حد عشان محدش هيرضى انو يتجوز واحده من الدار او الملجأ
هو انى اكون يتيم ده عيب ؟
لو حسيت بجزء من احساسهم اسال عنهم صاحبهم ومترحلهومش فى عيد اليتيم بس ده لو كنت بترحلهم اصلا...
آية محيسن